Ang pamamaga ng talukap o eyelid ay nangyayari kapag ang labis na likido (edema) ay naiipon sa mga tisyu sa paligid ng mga mata. Ito ay sanhi ng inflammation at pinapamaga ang mga mata. Ang namamagang mata ay maaaring maapektuhan ang parehong itaas at ibabang talukap na mayroon o walang kasamang pananakit.
Maraming maaaring sanhi ang namamagang talukap o swollen eyelids mula sa mga impeksyon, pinsala, trauma, o allergy sa mata. Sa mga bihirang kaso, ang pamamaga ng talukap ay maaaring magpahiwatig ng isang seryosong kondisyon o problema sa paningin kagaya ng orbital cellulitis, Grave’s disease, o ocular herpes.
Kung ang pamamaga ay nagpapatuloy, lumala, o nagbabago, lubos na inirerekomenda na bisitahin kaagad ang iyong doktor sa mata.
Mga Sintomas ng Namamagang Takipmata
Ang namamagang mata o talukap ay karaniwang may isa o higit pa sa mga sumusunod na sintomas sa mata:
● Pagkasensitibo sa liwanag (Photophobia)
● Pangangati
● Pagluluha
● Pamumula
● Flaking o pagkatuyo ng takipmata
● Paghina ng paningin
● Discharge
● Pananakit, lalo na kapag ang pamamaga ay sanhi ng impeksyon.
Narito ang isang mas detalyadong impormasyon sa pinakakaraniwang mga sintomas ng namamagang takipmata:
Makating Mata
Kadalasan, ang mga allergy ay sanhi ng pamamaga ng takipmata. Ang polen, dust, dander ng hayop, at iba pang mga allergens ay karaniwang sanhi ng produksyon ng histamine sa paligid ng mga mata na maaaring magresulta sa pangangati, pamumula, at pamamaga.
Pagkasensitibo Sa Liwanag
Bilang reaksyon ng pagiging sensitibo sa liwanag o photophobia, ang mga takipmata ay maaaring mamaga at maging sanhi ng discomfort at paniningkit ng mata. Ang pagkasensitibo sa liwanag gaya ng sinag ng araw, fluorescent, at mga incandescent na ilaw ay maaari ring samahan ng pananakit ng ulo.
Dry Eyes
Ang dry eye syndrome ay maaaring maging sanhi ng maraming mga isyu, kabilang ang pamamaga ng takipmata. Ang dry eye syndrome ay naguugat sa chronic na hindi sapat na lubrication at moisture sa ibabaw ng mata. Ang matinding kahihinatnan ng tuyong mga mata ay pamamaga at pagkakapilat ng ibabaw ng mata o kornea.
Pananakit Ng Mata
Ang pananakit ng mata ay karaniwang sinasamahan ng malabong paningin, pamumula, pagkasensitibo sa ilaw, at pamamaga ng talukap. Ang pananakit ng mata ay isang catch-all na parirala na ginagamit upang ilarawan ang discomfort, sa likod o paligid ng mata.
Puffy Eyes vs. Namamagang Talukap
Ang terminong “puffy eyes” ay madalas na inaakalang kapareho ng “namamagang mga mata o talukap.” Sa katunayan, ang dalawang kondisyon ay magkaiba. Ang “namamagang mga mata o talukap” ay karaniwang ginagamit upang ilarawan ang isang allergic attack, pinsala, o impeksyon sa mata. Samantalang ang “puffy eyes” ay mas angkop na gamitin upang ilarawan ang mga panlabas na katangian ng water retention, genetic traits gaya ng dark circles, o kakulangan sa tulog.
