Ang sobrang pagtutubig ng mata ay tinatawag na epiphora o pagluluha. Ito ay isang kondisyon kung saan mayroong labis na produksyon ng mga luha. Ang mga luha ay mahalaga upang mapanatiling malusog ang ibabaw ng mata na may malinaw na paningin. Gayunpaman, ang sobrang pagluluha ay maaaring magdulot ng paghihirap na makakita at maaaring maging isang potensyal na panganib para sa mga aktibidad tulad ng pagmamaneho
Maaaring mangyari ang epiphora sa anumang edad ngunit mas karaniwan sa mga sanggol na wala pang 12 buwan o mga matatandang higit sa 60 taong gulang. Sa kabutihang-palad, ang labis na pagluluha ng mata ay karaniwang nagagamot.
Mga sanhi
Ang dalawang pangunahing sanhi ng pagtutubig ng mga mata ay ang mga baradong daluyan ng luha at labis na produksyon ng mga luha.
Sobrang produksyon ng mga luha. Ang mga nairitang mata ay nakadudulot ng sobrang produkson ng luha dahil sa sinusubukan ng katawan na alisin ang anumang nakapagpairita ng mata gaya ng mga alikabok at maliliit na bagay. Ang mga kemikal tulad ng usok at maging ang mga sibuyas ay maaaring maging sanhi ng pagluluha ng mata. Ang conjunctivitis, pinsala sa mata, trichiasis (paloob na pagtubo ng mga pilikmata), at ectropion (palabas na pagtupi ng ibabang talukap ng mata) ay maaari ring maging sanhi ng labis na produksyon ng mga luha bilang isang mekanismo ng proteksyon ng mga mata.
Baradong daluyan ng luha. Ang mga bagong ipinanganak na sanggol ay karaniwang may matubig na mga mata na lumiliwanag pagkatapos ng ilang linggo habang ang kanilang mga tear duct o daluyan ng luha ay nabubuo pa lamang. Para sa mga nasa hustong gulang, ang ilan ay may mga tear duct na masyadong makitid na maaaring sanhi ng pamamaga o maaari itong maimpeksyon. Kung ang mga tear duct ay makitid o may bara, ang mga luha ay maaaring mamuo sa tear sac na maaaring humantong sa impeksyon. Ang mata ay maglalabas ng mas malagkit na likido bilang tugon sa impeksiyon, na magpapalala sa problema.
Ang ilang mga tao ay may mga luha na mayroong high fat o lipid na nilalaman na maaaring makagambala sa balanseng pagkalat ng likido sa mata. Maaari itong mag-iwan ng mga tuyong patak na maaaring humantong sa pananakit at pangangati na nagiging sanhi ng paglabas ng mga luha ng mata.
Ang iba pang mga sanhi ng epiphora ay:
- styes, bukol sa talukap ng mata
- keratitis, impeksyon sa kornea
- corneal ulcer, sugat sa mata
- tuyong mata
- allergy
- problema sa mga Meibomian glands sa mata
- paggamit ng ilang mga gamot
Paggamot
Ang tamang opsyon sa paggamot ay nakasalalay sa kalubhaan at sanhi ng problema. Sa karamihan ng mga kaso, ang matubig na mga mata ay kusang nawawala sa loob ng ilang oras. Gayunpaman, ang ilang mga kaso ay maaaring umuulit at maaaring makagambala sa mga pang-araw-araw na gawain. Ang iba’t ibang mga sanhi ng epiphora ay nangangailangan ng iba’t ibang mga opsyon sa paggamot:
Irritation: Kung ang epiphora na dulot ng impeksyon ay tumatagal ng higit sa isang linggo, maaaring magreseta ang doktor ng mga antibiotic para patayin ang bacteria sa mata.
Mga baradong tear duct: Upang dumaloy ang mga luha sa mga baradong tear duct, maaaring gawin ang isang dacryocystorhinostomy (DCR). Lumilikha ito ng bagong daluyan mula sa tear sac hanggang sa loob ng ilong.
Trichiasis: Aalisin ng doktor ang lumalagong pilikmata sa loob o anumang dayuhang bagay na nakalagay sa mata.
Ectropion: Maaaring gawin ang isang operasyon upang higpitan ang tendon na humahawak sa panlabas na takipmata sa lugar.
Kung ang mga drainage channel sa loob ng mata ay makitid lamang ngunit hindi ganap na barado, maaaring palawakin ito ng doktor gamit ang isang probe. Gayunpaman, ang isang tuluyang barado na drainage channel, o canaliculi, ay maaaring mangailangan ng operasyon.
Para sa mga banayad na kaso ng pagtutubig ng mga mata, pinakamahusay na bigyan ang iyong mga mata ng pahinga sa loob ng ilang oras at ilubricate ang mga ito gamita ang mga eyedrops. Maaari mo ring ilagay ang isang mainit at mamasa-masa na tela sa ibabaw ng mga talukap ng mata at imasahe ang mga ito upang maibsan ang anumang bara.
