Ang Alexandria’s genesis ay walang iba kundi isang online na alamat. Ang paniniwalang ang mga mata ng tao na nagiging lila o purple ay isang kathang-isip lamang. Mahigit sa 150 katao na nagsasabing mayroon silang pekeng kundisyon na ito ay sinasabing sila ay may mga lila o purple na mata, maputlang balat, walang buhok sa katawan, perpektong proporsyonadong mga katawan, mataas na antas ng fertility nang walang regla sa mga kababaihan, at mahusay na mga immune system. Sa madaling sabi, inaangkin nila na sila ay perpektong mga tao.
Sa kabila ng kawalang katotohanan ng Alexandria’s genesis, maraming mga totoong kondisyong medikal na maaaring maging sanhi ng pagbabago ng kulay ng iris sa mata.
Mga Kundisyon Na Maaaring Baguhin Ang Kulay ng Mata
Ang may kulay na parte sa mata ay tinatawag na iris. Ito ay responsable sa pagkontrol ng dami ng ilaw na pumapasok sa mata. Imposibleng maipanganak ang isang tao na may mga lila o purple na mata at ang Alexandria’s genesis ay hindi isang tunay na kondisyon.
Ang mga sumusunod na tunay na kondisyong medikal ay maaaring baguhin ang kulay ng iris nang bahagya, ngunit hindi kailanman magiging lila o purple:
Pagtanda. Ang mga sanggol na ipinanganak na may kulay-abo o asul na mga mata ay maaaring maging normal ang kulay sa paglipas ng panahon at maaring maging berde, hazel, o kayumanggi. Ang mga pagbabago sa kulay ng mata sa pagtanda ay sanhi ng melanin bilang tugon sa light exposure. Sa edad na 6, ang kulay ng mata ay normal na humihinto sa pagbabago. Gayunpaman, ang ilang mga tao ay nakakaranas pa rin ng pagbabago ng kulay ng mata hanggang pagdadalaga at pagiging matanda, na nakakaapekto sa 10-15 porsyento ng mga taong Caucasian.
Heterochromia iridis. Ang kondisyong ito ay nagsasanhi sa mga mata na magkaroon ng magkaibang kulay. Ang isa pang anyo ng kondisyong ito ay tinatawag na segmental heterochromia na nagsasanhi sa isang iris na magkaroon ng magkaibang kulay.
Fuchs’ heterochromic uveitis (FHU). Ito ay isang bihirang kundisyon na nagdudulot ng pangmatagalang pamamaga ng iris at iba pang mga bahagi ng mata na nagsasanhi ng pagbabago sa kulay ng mata.
Pigmentary glaucoma. Ang ganitong uri ng glaucoma ay nagdudulot ng pigmentation sa iris na mahulog bilang maliliit na butil na nagbabara sa mga kanal ng mata. Maaari itong humantong sa mga abnormalidad sa iris na maaaring magdala ng banayad na mga pagbabago sa kulay ng mata.
Mga bukol sa iris. Ang mga bukol sa iris ay maaaring maging sanhi ng pagbaluktot na hitsura ng may kulay na bahagi ng mata na maaaring magbigay ng isang ilusyon ng pagkakaiba ng kulay ng iris. Maaaring baguhin ng tumor ang hugis at kulay ng iris na puwedeng makagambala sa pupils, buong mata, at paningin sa pangkalahatan.
Medicated eye drops. Mayroong ilang mga gamot na pampatak sa mata para sa glaucoma na maaaring baguhin ang kulay ng mata. Ang mga prostaglandin analogs ay maaaring mapadilim ang mga light-colored na mata. Ang mga produktong Bimatoprost na ginagamit bilang eyelash enhancers tulad ng Latisse ay maaari ring madagdagan ang brown pigmentation sa mga mata.
Kung napansin mo ang anumang mga pagbabago sa hitsura ng iyong mata, kumunsulta kaagad sa iyong doktor. Ang anumang biglaang pagbabago sa kulay ng mga mata lalo na kapag sinamahan ng malabong paningin, sakit sa mata, o iba pang mga komplikasyon ay dapat na mabilis na maiulat sa iyong doktor.
